Astapadi 24

Astapadi 24

कुरु यदुनन्दन चन्दनशिशिरतरेण करेण पयोधरे ।

मृगमदपत्रकमत्र मनोभवमङ्गलकलशसहोदरे ।

निजगाद सा यदुनन्दने क्रीडति हृदयानन्दने ॥ १॥

kuru yadunandanachandanashishiratareṇa kareṇa payodhare ।

mṛgamadapatrakamatra manobhavamaṅgalakalasha-sahodare ।

nijagāda sā yadunandane krīḍati hṛdayānandane ॥ 1॥

अलिकुलगञ्जनमञ्जनकं रतिनायकसायकमोचने ।

त्वदधरचुम्बनलम्बितकज्जलमुज्ज्वलय प्रिय लोचने ॥ २॥ निजगाद

alikulagañjanamanjanakaṁ ratināyakasāyakamochane ।

tvadadhara-cumbanalambitakajjalamujjvalaya priya locane ॥ 2॥ nijagāda

नयनकुरङ्गतरङ्गविलासनिरासकरे श्रुतिमण्डले ।

मनसिजपाशविलासधरे शुभवेश निवेशय कुण्डले ॥ ३॥ निजगाद

nayanakuraṅgatarangavilāsanirāsakare śrutimaṇḍale ।

manasijapāśavilāsadhare śubhavesha niveśaya kuṇḍale ॥ 3॥ nijagāda

भ्रमरचयं रचयन्तमुपरि रुचिरं सुचिरं मम सम्मुखे ।

जितकमले विमले परिकर्मय नर्मजनकमलकं मुखे ॥ ४॥ निजगाद

bhramarachayaṁ racayantamupari ruchiraṁ suchiraṁ mama sammukhe ।

jitakamale vimale parikarmaya narmajanakamalakaṁ mukhe ॥ 4॥ nijagāda

मृगमदरसवलितं ललितं कुरु तिलकमलिकरजनीकरे ।

विहितकलङ्ककलं कमलानन विश्रमितश्रमशीकरे ॥ ५॥ निजगाद

mṛgamadarasavalitaṁ Lalitaṁ kuru tilakamalikarajanīkare ।

vihitakalankakalaṁ kamalānana vishramitashramashīkare ॥ 5॥ nijagāda

मम रुचिरे चिकुरे कुरु मानद मनसिजध्वजचामरे ।

रतिगलिते ललिते कुसुमानि शिखण्डिशिखण्डकडामरे ॥ ६॥ निजगाद

mama ruchire chikure kuru mānada manasijadhvajachāmare ।

ratigalite Lalite kusumāni śikhaṇḍi-śikhaṇḍakaḍāmare ॥ 6॥ nijagāda

सरसघने जघने मम शम्बरदारणवारणकन्दरे ।

मणिरशनावसनाभरणानि शुभाशय वासय सुन्दरे ॥ ७॥ निजगाद

sarasaghanē jaghanē mama śambaradāraṇavāraṇakandare ।

maṇiraśanāvasanābharaṇāni śubhāśaya vāsaya sundare ॥ 7॥ nijagāda

श्रीजयदेववचसि रुचिरे हृदयं सदयं कुरु मण्डने ।  

हरिचरणस्मरणामृतनिर्मितकलिकलुषज्वरखण्डने ॥ ८॥ निजगाद

śrījayadevavacasi ruchire hṛdayaṁ sadayaṁ kuru maṇḍane ।

haricaraṇasmaraṇāmṛtanirmitakalikalushajvarakhaṇḍane ॥ 8॥ nijagāda

रचय कुचयोः पत्रं चित्रं कुरुष्व कपोलयो-

र्घटय जघने काञ्चीमञ्च स्रजा कबरीभरम् ।

कलय वलयश्रेणीं पाणौ पदे कुरु नूपुरा-

विति निगतितः प्रीतः पीताम्बरोऽपि तथाकरोत् ॥ ९०॥

racaya kucayoḥ patraṁ citraṁ kuruṣva kapolayo-

rghaṭaya jaghane kāñcīmañca srajā kabarībharam ।

kalaya valayaśreṇīṁ pāṇau pade kuru nūpurā-

viti nigataḥ prītaḥ pītāmbaro'pi tathākarot ॥ 90॥

पर्यङ्गीकृतनागनायकफणश्रेणीमणीनां गणे

सङ्क्रान्तप्रतिबिम्बसङ्कलनया बिभ्रद्वपुर्विक्रियाम् ।

पादाम्भोरुहधारिवारिधिसुतामक्ष्णां दिदृक्षुः शतैः

कायव्यूहविचारयन्नुपचिताकूतो हरिः पातु वः ॥ ९१॥

paryaṅgīkṛtanāganāyakaphaṇaśreṇīmaṇīnāṁ gaṇe

saṅkrāntapratibimbasaṅkalanayā bibhradvapurvikriyām ।

pādāmbhoruhadhārivāridhisutāmakṣṇāṁ didṛkuḥ śataiḥ

kāyavyūhavicārayannupacitākūto hariḥ pātu vaḥ ॥ 91॥

यन्नित्यैर्वचनैर्विरिञ्चगिरिजाप्राणेशमुख्यैर्मुहुः

नानाकारविचारसारचतुरैर्नाद्यापि निश्चीयते ।

तत्सर्वैर्जयदेवकाव्यघटितैस्सत्सूरिसंशोधितै-

राद्यं वस्तु चकास्तु चेतसि परं सारस्यसीमाजुषाम् ॥ ९२॥

yannityairvacanairviriñcagirijāprāṇeśamukhyairmuhuḥ

nānākāravicārasāracaturairnādyāpi niścīyate ।

tatsarvairjayadevakāvyaghaṭitaisatsūrisaṁśodhitai-

rādyaṁ vastu cakāstu cetasi paraṁ sārasyasīmājuṣām ॥ 92॥

यद्गान्धर्वकलासु कौशलमनुध्यानं च यद्वैष्णवं

यच्छृङ्गारविवेकतत्त्वरचनाकाव्येषु लीलायितम् ।

तत्सर्वं जयदेवपण्डितकवेः कृष्णैकतानात्मनः

सानन्दाः परिशोधयन्तु सुधियः श्रीगीतगोविन्दतः ॥ ९३॥

yadgāndharvakalāsu kauśalamanudhyānaṁ ca yad vaiṣṇavaṁ

yacchr̥ṅgāravivekatattvaracanākāvyeṣu līlāyitam ।

tatsarvaṁ jayadevapaṇḍitakaveḥ kṛṣṇaikatānātmanaḥ

sānandāḥ pariśodhayantu sudhiyaḥ śrīgītagovindataḥ ॥ 93॥

साध्वी माध्वीकचिन्ता न भवति भवतः शर्करे कर्कशासि

द्राक्षे द्रक्ष्यन्ति के त्वाममृत मृतमसि क्षीरनीरं रसस्ते ।

क्रन्द कान्ताधर धरणितलं गच्छ यच्छान्तिभावं

यावच्छृङ्गारसारस्वतमिह जयदेवस्य विष्वग्वचांसि ॥ ९४॥

sādhvī mādhvīkacintā na bhavati bhavataḥ śarkare karkaśāsi

drākṣe drakṣyanti ke tvāmamṛta mṛtamasi kṣīranīraṁ rasaste ।

kranda kāntādhara dharṇitalaṁ gaccha yacchāntibhāvaṁ

yāvacchr̥ṅgārasārasvatamiha jayadevasya viṣvagvācāṁsi ॥ 94॥

श्रीभोजदेवप्रभवस्य राधादेवीसुतश्रीजयदेवकस्य । 

पराशरादिप्रियवर्गकण्ठे श्रीगीतगोविन्दकवित्वमस्तु ॥ ९५॥

śrībhojadevaprabhavasya rādhādevīsutāśrījayadevakasya ।

parāśarādipriyavargakaṇṭhe śrīgītagovindakavitvamastu ॥ 95॥

॥ इति श्रीजयदेवकृतौ गीतगोविन्दे सुप्रीतपीताम्बरो नाम द्वादशः सर्गः ॥

॥ iti śrījayadevakṛtau gītagovinde suprītapītāmbaro nāma dvādaśaḥ sargaḥ ॥

॥ इति गीतगोविन्दं समाप्तम् ॥

॥ iti gītagovindaṁ samāptam ॥