Astapadi 11

Astapadi 11

रतिसुखसारे गतमभिसारे मदनमनोहरवेशम् ।

न कुरु नितम्बिनि गमनविलम्बनमनुसर तं हृदयेशम् ॥

Ratisukhasāre gatamabhisāre madanamanoharaveśam ।

Na kuru nitambini gamanavilambanamanusara taṁ hṛdayeśam ॥

धीरसमीरे यमुनातीरे वसति वने वनमाली

गोपीपीनपयोधरमर्दनचञ्चलकरयुगशाली  ॥ १॥

Dhīrasamīre yamunātīre vasati vane vanamālī

Gopīpīnapayodharamardanacañcalakarayugaśālī ॥ १॥

नाम समेतं कृतसंकेतं वादयते मृदुवेणुम् ।

बहु मनुते ननु ते तनुसंगतपवनचलितमपि रेणुम् ॥ २॥ धीरसमीरे  

Nāma sametaṁ kṛtasamketaṁ vādayate mṛduveṇum ।

Bahu manute nanu te tanusangatapavanacalitamapi reṇum ॥ २॥ dhīrasamīre

पतति पतत्रे विचलति पत्रे शङ्कितभवदुपयानम् ।

रचयति शयनं सचकितनयनं पश्यति तव पन्थानम् ॥ ३॥ धीरसमीरे

Patati patatre vicalati patre śaṅkitabhavadupayānam ।

Racayati śayanaṁ sacakitanayanaṁ paśyati tava panthānam ॥ ३॥ dhīrasamīre

मुखरमधीरं त्यज मञ्जीरं रिपुमिव केलिसुलोलम् ।

चल सखि कुञ्जं सतिमिरपुञ्जं शीलय नीलनिचोलम् ॥ ४॥ धीरसमीरे

Mukharamadhīraṁ tyaja mañjīraṁ ripumiva kelisulolam ।

Chala sakhi kuñjaṁ satimirapuñjaṁ śīlaya nīlanicholam ॥ ४॥ dhīrasamīre

उरसि मुरारेरुपहितहारे घन इव तरलबलाके ।

तडिदिव पीते रतिविपरीते राजसि सुकृतविपाके ॥ ५॥ धीरसमीरे

Urasimurārerupahitahāre ghana iva taralabalāke ।

Taḍidiva pīte rativiparīte rājasi sukrutavipāke ॥ ५॥ dhīrasamīre

विगलितवसनं परिहृतरसनं घटय जघनमपिधानम् ।

किसलयशयने पङ्कजनयने निधिमिव हर्षनिदानम् ॥ ६॥ धीरसमीरे

Vigalitavasanaṁ parihṛtarasanaṁ ghaṭaya jaghanamapadhānam ।

Kisalayashayane paṅkajanayane nidhimaṁ harṣanidānam ॥ ६॥ dhīrasamīre

हरिरभिमानी रजनिरिदानीमियमपि याति विरामम् ।

कुरु मम वचनं सत्वररचनं पूरय मधुरिपुकामम् ॥ ७॥ धीरसमीरे

Harirabhimānī rajaniridānīmiyamapi yāti virāmam ।

Kuru mama vacanaṁ satvararachanaṁ pūraya madhuripukāmam ॥ ७॥ dhīrasamīre

श्रीजयदेवे कृतहरिसेवे भणति परमरमणीयम् ।

प्रमुदितहृदयं हरिमतिसदयं नमत सुकृतकमनीयम् ॥ ८॥ धीरसमीरे

Śrījayadeve kṛtahariseve bhaṇati paramaraṁṇīyam ।

Pramuditahṛdayaṁ harimatīsadayaṁ namata sukrutakamanīyam ॥ ८॥ dhīrasamīre

विकिरति मुहुः श्वासानाशाः पुरो मुहुरीक्षते

प्रविशति मुहुः कुञ्जं गुञ्जन्मुहुर्बहु ताम्यति ।

रचयति मुहुः शय्यां पर्याकुलं मुहुरीक्षते

मदनकदनक्लान्तः कान्ते प्रियस्तव वर्तते ॥ ३६॥

Vikirati muhuḥ śvāsānāśāḥ puro muhurīkṣate

Praviśati muhuḥ kuñjaṁ guñjanmuhurbahu tāmyati ।

Racayati muhuḥ śayyāṁ paryākulaṁ muhurīkṣate

Madanakadanaklāntaḥ kānte priyastava vartate ॥ ३६॥

त्वद्वाम्येन समं समग्रमधुना तिग्मांशुरस्तं गतो

गोविन्दस्य मनोरथेन च समं प्राप्तं तमः सान्द्रताम् ।

कोकानां करुणस्वनेन सदृशी दीर्घा मदभ्यर्थना

तन्मुग्धे विफलं विलम्बनमसौ रम्योऽभिसारक्षणः ॥ ३७॥

Tvadvāmyena samaṁ samagramadhunā tigmāṁśurastam gato

Govindasya manorathena cha samaṁ prāptaṁ tamaḥ sāndratām ।

Kokānāṁ karuṇasvanena sadṛśī dīrghā madabhyarthanā

Tanmugdhe vifalaṁ vilambanam asau ramyo'bhisaṁrakṣaṇaḥ ॥ ३७॥

आश्लेषादनु चुम्बनादनु नखोल्लेखादनु स्वान्तज-

प्रोद्बोधादनु सम्भ्रमादनु रतारम्भादनु प्रीतयोः ।

अन्यार्थं गतयोर्भ्रमान्मिलितयोः सम्भाषणैर्जानतो-

र्दम्पत्योरिह को न को न तमसि व्रीडाविमिश्रो रसः ॥ ३८।

Āśleṣādanu chumbanādanu nakhollekhādanu svāntaja-

Prodbodhādanu sambhramādanu ratārambhādanu prītayoḥ ।

Anyārthaṁ gatayorbhramānmilitayoḥ sambhāṣaṇairjānato-

Rdampatyoriha ko na ko na tamasi vrīḍāvimishro rasaḥ ॥ ३८।

सभयचकितं विन्यस्यन्तीं दृशौ तिमिरे पथि

प्रतितरु मुहुः स्थित्वा मन्दं पदानि वितन्वतीम् ।

कथमपि रहः प्राप्तामङ्गैरनङ्गतरङ्गिभिः

सुमुखि सुभगः पश्यन्स त्वामुपैतु कृतार्थताम् ॥ ३९॥

Sabhayachakitam vinyasyantīṁ dṛśau timire pathi

Pratitaru muhuḥ sthitvāmandaṁ padāni vitanvatīm ।

Kathamapi rahaḥ prāptāmaṅgairanangatarangibhiḥ

Sumukhi subhagaḥ paśyans s tvaṁupaitu kṛtārthatām ॥ ३९॥

राधामुग्द्धमुखारविन्दमधुपस्त्रैलोक्यमौलिस्थली

नेपथ्योचितनीलरत्नमवनीभारावतारक्षमः ।

स्वच्छन्दं व्रजसुन्दरीजनमनस्तोषप्रदोषश्चिरं

कंसध्वंसनधूमकेतुरवतु त्वां देवकीनन्दनः ॥ ४०॥

Rādhāmugdhamukhāravindamadhupastrailokyamaulisthalī

Nepathyocitanīlaratnamavanībhārāvatārakṣamaḥ ।

Svacchandaṁ vrajasundarījanamanastoshapradoṣaśchiraṁ

Kaṁsadhvaṁsanadhūmaketuravatu tvāṁdevakīnandanaḥ ॥ ४०॥

॥ इति श्रीगीतगोविन्देऽभिसारिकवर्णने साकाङ्क्षपुण्डरीकाक्षो नाम पञ्चमः सर्गः ॥

॥ Iti śrīgītagovinde'bhisaṁrikavarṇane sākāṅkṣapuṇḍarīkākṣo nāma Pañcamah sargaḥ ॥