Astapadi 10

Astapadi 10

वहति मलयसमीरे मदनमुपनिधाय ।

स्फुटति कुसुमनिकरे विरहिहृदयदलनाय ॥

तव विरहे वनमाली सखि सीदति ॥ १॥

vahati malayasamīre madanamupanidhāya |

sphuṭati kusumanikare virahihṛdayadalanāya ||

tava virahe vanamālī sakhi sīdati || 1 ||

दहति शिशिरमयूखे मरणमनुकरोति ।

पतति मदनविशिखे विलपति विकलतरोऽति ॥ २॥ तव विरहे

dahati śiśiramayūkhe maraṇamanukaroti |

patati madanaviśikhe vilapati vikalataroti || 2 || tava virahe

ध्वनति मधुपसमूहे श्रवणमपि दधाति ।

मनसि वलितविरहे  निशि निशि रुजमुपयाति ॥ ३॥ तव विरहे

dhvanati madhupasamūhe śravaṇamapi dadhāti |

manasi valitavirahe niśi niśi rujamupayāti || 3 || tava virahe

वसति विपिनविताने त्यजति ललितधाम ।

लुठति धरणिशयने बहु विलपति तव नाम ॥ ४॥ तव विरहे

vasati vipinavitāne tyajati lalitadhāma |

luṭhati dharaṇiśayane bahu vilapati tava nāma || 4 || tava virahe

रणति पिकसमुदाये प्रतिदिशमनुयाति ।

हसति मनुजनिचये विरहमपलपति नेति ॥ ५॥   तव विरहे

raṇati pikasamudāye pratidiśamanuyāti |

hasati manujanichaye virahamapalapati neti || 5 || tava virahe

स्फुरति कलरवरावे स्मरति भणितमेव ।

तव रतिसुखविभवे बहुगणयति गुणमतीव ॥ ६॥ तव विरहे

sphurati kalaravarāve smarati bhaṇitameva |

tava ratisukhavibhave bahugaṇayati guṇamatīva || 6 || tava virahe

त्वदभिदशुभदमासं वदतु नरि श‍ृणोति ।

तमपि जपति सरसं परयुवतिषु न रतिमुपैति ॥ ७॥  तव विरहे

tvadabhidashubhadamāsaṁ vadatu nari śṛṇoti |

tamapi japati sarasaṁ parayuvatiṣu na ratimupaiti || 7 || tava virahe

भणति कविजयदेवे विरहिविलसितेन ।

मनसि रभसविभवे हरिरुदयतु सुकृतेन ॥ ८॥ तव विरहे

bhaṇati kavijayadeve virahivilasitena |

manasi rabhasavibhave harirudayatu sukr̥tena || 8 || tava virahe

पूर्वं यत्र समं त्वया रतिपतेरासादिताः सिद्धय-

स्तस्मिन्नेव निकुञ्जमन्मथमहातीर्थे पुनर्माधवः ।

ध्यायंस्त्वामनिशं जपन्नपि तवैवालापमन्त्रावलीं

भूयस्त्वत्कुचकुम्भनिर्भरपरीरम्भामृतं वाञ्छति ॥ ३५॥

pūrvaṁ yatra samaṁ tvayā ratipaterāsāditāḥ siddhayaḥ

tasmīnneva nikuñjamamathamahātīrthe punarmādhavaḥ |

dhyāyaṁstvāmaniśaṁ japannapi tavaivālāpamantrāvalīṁ

bhūyastvatkucakumbhanirbharaparīrambhāmṛtaṁ vāñchati || 35 ||